ბაია აბულაძე

“ვიცი, რომ თითოეულ ძირ ვაზს თავის დროზე თუ არ მოვუარე, შრომა ტყუილად ჩაივლის”.

ჩემი ცხოვრების უმეტესი ნაწილი მშობლიურ სოფელთან, ვაზსა და ღვინოსთანაა დაკავშირებული. მეღვინეობა-მევენახეობის სიყვარული მემკვიდრეობით გადმომეცა – ჩემი ბაბუა, ბონდო ღვალაძე, ცნობილი მევენახეა. ჩემს ოჯახს 4000-მდე ძირი ცოლიკოური და ციცქა აქვს, უმეტესად კი – ახაშენი. ვენახის მოვლა და უხვი მოსავლის მიღება ბევრ ფაქტორზეა დამოკიდებული: ამინდი, აგრო ვადების ზუსტი დაცვა და ა.შ.

ოჯახში ძალიან გვიყვარს ღვინო, განსაკუთრებით ბაბუას. საჭმელს ისე არ შეჭამდა, რომ ერთი ჭიქა გემრიელი ღვინო არ დაეყოლებინა. მეორე ბაბუა პროფესიით მევენახე-მეღვინეა, მის გამოცდილებას ძალიან დიდ პატივს ვცემთ და მივყვებით. ჩემმა დამაც, სოციალური მეცნიერებების სწავლას თავი დაანება და აგრონომიის მაგისტრი გახდა. ძმა მეღვინეობის და მევენახეობის ფაკულტეტზე სწავლობს. ჩემი ოჯახის თითოეული წევრი ამ საქმეშია ჩართული.

მევენახის საქმიანობა საკმაოდ შრომატევადია, ოჯახის წევრებთან ერთად გაკეთებული საქმე კი – სასიამოვნო და სახალისო. ვიცი, რომ თითოეულ ძირ ვაზს თავის დროზე თუ არ მოვუარე, შრომა ტყუილად ჩაივლის.

მოგეხსენებათ, რომ ჩვენი სოფლები თანდათან იცლება. როდესაც ხედავდნენ, რომ სოფელში რაღაცას ვაკეთებდით, თანაც დასავლეთ საქართველოში, ჩვენს მეზობლებს და ახლობლებს ძალიან უხაროდათ.

ძალიან ბევრი ახალგაზრდა მწერდა და მწერს სოციალურ ქსელში. მეკითხებიან, როგორ შეიძლება დაიწყონ მსგავსი საქმიანობა. უამრავი ახალგაზრდა გავიცანი, ვისაც ძალიან კარგი სამსახური და განათლება აქვს, მაგრამ სოფელში ბრუნდება, იწყებს სოკოს წარმოებას, ღვინის თუ ტურისტულ ბიზნესს და ასე შემდეგ. ჩემი თანატოლების ასეთი განწყობა ძალიან მახარებს.

სკოლა ჩემს სოფელში, ობჩაში დავამთავრე. როცა უნივერსიტეტში ჩავაბარე და თბილისში გადმოვედი, სულ სხვა გარემოში მოვხვდი. ყველაზე საამაყო თემა, რაზე საუბარიც ჩემს მეგობრებთან მინდოდა და ჩემს სოფელს ეხებოდა, ღვინო იყო.

ნელ-ნელა დავიწყე ფიქრი, თუ რა მაგარი იქნებოდა ჩვენი ღვინოც რომ წარმატებული ყოფილიყო და რამდენ საკითხში შეგვიწყობდა ეს ხელს.

2015 წლის დეკემბერში ოჯახმა პირველი ბოთლი ,,ბაიას ღვინო“ ჩამოასხა. ღვინომ მონაწილეობა მიიღო საქართველოში გამართულ ღვინის მრავალ ფესტივალსა და ღონისძიებაში და საერთო მოწონებაც დაიმსახურა. 2016 წლის ივნისში, გერმანიის ქალაქ დიუსელდორფში გამართულ ღვინის ფესტივალზე კი ვერცხლის მედალი აიღო.

ამაყები ვართ იმით, რომ თბილისში, ქუთაისსა და ბათუმში მაღალი ხარისხის რესტორნებსა და ღვინის მაღაზიებში ჩვენი ადგილის დაკავება მოვახერხეთ.

თავიდან გვეგონა, რომ უცხოეთის ბაზარზე გასვლა წარმოუდგენელი იყო, მაგრამ ჩვენი ღვინო დღეს უკვე რამდენიმე ქვეყანაში გადის ექსპორტზე. მათ შორის აშშ-ში, საფრანგეთში, გერმანიასა და ავსტრიაში.

***

ბაია აბულაძე “ართთაიმის” ყველაზე ახალგაზრდა მეგობარია. ტრადიციული საქმის ახლებურად კეთების იდეა ჩვენთვის კარგად ნაცნობია და შთაგონების წყაროა, სწორედ ამიტომ გადავწყვიტეთ ის ჩვენი მეგობრების წრეში მოგვეწვია.