ვაკეთებ იმას, რაც ძალიან მიყვარს და მაინტერესებს, რისი კეთებაც არასდროს მბეზრდება.
“ვაკეთებ იმას, რაც ძალიან მიყვარს და მაინტერესებს, რის კეთებაც არასდროს მბეზრდება. განათლებით იურისტი ვარ და ფოტოგრაფია, როგორც პროფესია, უკვე ზრდასრულ ასაკში სრულიად გააზრებულად ავირჩიე. შესაბამისად, ჩემი საქმე ძალიან მაბედნიერებს. ფირის ფოტოგრაფია ჩემთვის ფოტოგრაფიის ერთადერთი ჭეშმარიტი ფორმაა. შეიძლება უხეშად და ხმამაღლა ჟღერს, მაგრამ 12 წლის განმავლობაში ბევრი სტილი და ჟანრი ვცადე, ციფრულითაც ვიღებდი და მობილურითაც, მაგრამ ბოლოს ყოველთვის ფირთან მივდივარ.
ჩემს გადაღებულ ციფრულ ფოტოებში ყოველთვის რაღაც მაკლია, რაღაც ისე არაა, როგორც “საჭიროა”. ისეთ ესთეტიკურ სიამოვნებას არ მანიჭებს, როგორც ფირით გადაღებული ფოტო.
შეიძლება ეს აკვიატებასავით ჟღერს, მაგრამ ფაქტია, ფირზე აღბეჭდილი შუქი, ფერი და ფაქტურა სულ სხვა სიღრმეებს იპყრობს.
ჩემი ინსპირაციის მთავარი წყარო არის შუქი და განათებაა. ნებისმიერი სუბიექტი თუ ობიექტი, სხვადასხვა განათების პირობებში, სრულიად სხვადასხვანაირად შეიძლება დავინახოთ. ასევე, ჩემი შთაგონების მიზეზი შეიძლება იყოს არქიტექტურა, გაშლილი სივრცეები და ზოგადად ნებისმიერი ლამაზი გარემო.”
* * *
ლუიზა ჩალათაშვილი 1987 წლის 18 ოქტომბერს თბილისში დაიბადა. ბავშვობა და სკოლის პერიოდი საგარეჯოში გაატარა.
2008 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტი. 2011 წელს – კავკასიის სამართლის სკოლის მაგისტრატურა ადმინისტრაციული სამართალის მიმართულებით.
ფოტოგრაფიით 2006 წელს დაინტერესდა და ამავე წლიდან ძირითადი პროფესიის პარალელურად მუშაობდა სხვადასხვა ფოტო პროექტზე.
2010 წელს გადაეცა ფოტოკონკურს “ქოლგა თბილისი ფოტოს” სპეციალური პრიზი ორიგინალური კადრისთვის. 2015 წელს მონაწილეობა მიიღო ჯგუფურ გამოფენაში “აღმოაჩინე საქართველო ნიუ იორკში”. 2016 წელს ქალაქ ბერლინში გაიმართა მისი პერსონალური გამოფენა სახელწოდებით “თრთვილი”. ამავე წელს გახდა საქართველოს საზოგადოებრივი მაუწყებლის პროექტის “ადამიანი კამერით” და „ქოლგა თბილისი ფოტოს“ (მობილური ფოტო: ერთი კადრი) გამარჯვებული.
***
ლუიზა ჩალათაშვილი “ართთაიმის” მეგობრების წრეში მოვიწვიეთ, როგორც საკუთარი საქმისადმი განსაკუთრებული დამოკიდებულების მქონე პროფესიონალი და ბევრი ადამიანისთვის ინსპირაციის წყარო.
TISSOT PR 100 SPORT CHIC
T1019101112100